除左餃子,車仔麵都係小編至愛!無論係午餐定下午茶,車仔麵都會係最佳選擇。喺百物騰貴嘅時勢下,慳得一蚊就一蚊,車仔麵就成為左窮人恩物!價錢唔算太貴又會飽肚,仲可以隨意揀選自己鍾意嘅餸,想食幾多就食幾多。一齊黎睇下香港有邊啲抵食嘅車仔麵啦!

 

【唔食唔得 - 香港5大抵食車仔麵!】

首先為大家介紹就係元朗嘅許祥昌車仔麵,可以話係小編由細食到大,簡直就係童年回憶產物。位於方便,由朗屏西鐵站行過黎只需要大約5分鐘,加上附近學校林立,又近巴士總站,四方八面引黎唔少捧場客。車仔麵分細丶大同加大3個份量,如果你想試哂咁多個餸可以揀「雜錦」,當然都可以自己揀餸,最多5個餸。小編最鍾意嘅餸係豬紅丶豬腸同埋雞翼尖,全部都十分入味!大大碗,價錢都只不過係廿零蚊,絕對抵食!除左車仔麵,當然唔少得嘢飲,喺珍珠奶茶仲未瘋行香港之前,許祥昌已經一早有賣,你仲可以揀加紅豆丶西米丶涼粉等等配料,任你點樣配搭都得,大大杯都只係十幾蚊。咁正嘅車仔麵又點可以唔捧場支持下?

 

店名:許祥昌車仔麵

地址:元朗擊壤路17號順發大廈地下B舖

營業時間:7:00 – 22:00

 

【唔食唔得 - 香港5大抵食車仔麵!】

圖片來源:openrice.com/ openrice.com/

呢間可能唔算太多人介紹過,不過小編依然想同大家分享下。可能喺旺角返工嘅朋友就會比較熟悉,呢間位於旺角熟食中心嘅長旺餐館提供超過40款餸,任你揀湯底配咩醬汁,完全度身訂造。3餸車仔麵連埋嘢飲都只不過係$29,最低消費嘅兩餸一麵都只係$24!而且當中有啲餸名哂特別,例如瑞士雞翼丶燒豬頸肉同埋南乳豬手等等。即使喺旺角地段經營,但係價錢依然係咁親民,簡直就全旺角打工仔嘅午餐恩物!唔怪得知每次黎到都有咁多粉絲!

 

店名:長旺餐館

地址:旺角上海街557號旺角熟食中心2樓

電話號碼:3514 9191

 

【唔食唔得 - 香港5大抵食車仔麵!】

圖片來源:weekendhk.com/

一齊黎轉戰牛頭角!由牛頭角地鐵站A出口行過去只需5分鐘,牛頭角宜安街街市嘅德興車仔麵出名抵食,如果你自認大食,可以揀有12款餸嘅大雜錦車仔麵,價錢只不過係$34!如果你想自己揀餸都得,有超過50款選擇,醬汁都有4款,真係心大心細啦。$18兩餸,$22三個餸,$26有四個餸,$30有五個餸,點會諗到九龍都會有平嘅車仔麵。當中較特別嘅餸有芝心雲吞丶龍蝦卷同埋釀青椒,除左車仔麵,餐廳仲會有炒粉麵同埋其他粉麵,不過黎到呢到梗係要先試下車仔麵啦!

 

店名:德興車仔麵

地址:觀塘宜安街1號A宜安街街市

營業時間:6:30 – 20:00

 

【唔食唔得 - 香港5大抵食車仔麵!】

圖片來源:imgrum.net/ seewide.com/

由牛頭角黎到觀塘,今次介紹嘅就係來多碗車仔麵,可能唔少住觀塘同牛頭角嘅朋友都唔會覺得陌生。皆因前舖係喺宜安街經營左30年,而家喺康寧道繼續經營,而且新店地方更大,坐得舒適。講到唔試唔得嘅餸就一定係辣汁魷魚,幾乎個個黎到都一定會食。除左辣汁魷魚,小編最鍾意嘅就係豬紅同豬腸,夠哂入味!覺得唔夠喉?你仲可以叫淨餸添食,唔怕會唔夠喉啦!價錢方面,2餸車仔麵賣$24,3餸車仔麵都只不過係$30,學生餐都只係$27就有3個餸車仔麵送埋嘢飲!

 

店名:德興車仔麵

地址:觀塘康寧道62號

營業時間:9:00 – 23:00

 

最後一站我地黎到荃灣,位於大河道嘅榮安小食同樣都係老字號,雖然睇黎唔算顯眼,但可以話係臥虎藏龍,就連米芝蓮都有介紹過!呢到價錢就有啲唔同,麵底同餸都係自由選擇,而唔係規定幾多個餸幾多錢。唔少人都會推介呢到嘅雞翼同雞翼尖,夠哂入味。鍾意食辣嘅朋友都可以試下呢到嘅辣,勁度十足!每到午餐同晚餐呢啲高峰時間就會大排長龍,想食就要早啲黎排隊啦!

 

店名:榮安小食

地址:荃灣大河道24號B地下

營業時間:9:00 – 0:00