對於一班影迷黎講,新一年最關注嘅當然就係有咩新戲睇!不過由於小編係恐怖片粉絲,所以今次就揀左4套必睇恐怖片俾大家,等大家可以望梅止渴。當然新一年又點止咁少大作?例如《兒凶》第四集丶《鬼娃恰吉》第七集丶《切勿關燈》第二集等等,不過由於好多恐怖片嘅資料仲未公佈,小編只好忍痛暫時放棄,一有新消息定必會再次分享。事不宜遲,立即睇睇有啲咩作品等緊大家!

 

首先介紹嘅就係暫定外國二月上映嘅《十三號星期五》,由1980年代開始,至今已經拍左超過10套電影,可以話係聞名天下嘅恐怖片,可見呢套電影嘅威力絕對唔細,無論咩年代都有捧場客。今年又會有新版本!戴住曲棍球面具嘅殺人魔再次登場,唔知道今次佢返黎又會想點……各位粉絲準備好未?

 

 

《詭娃安娜貝爾》第二集打到黎啦!身為溫子仁粉絲嘅小編真係好興奮,幾乎每套作品都係咁正!上集Annabelle嘅所作所為小編仲係歷歷在目,唔知佢今集又想搞邊科呢?今集嘅故事借轉移至娃匠同佢太太,20年前女兒不幸離世。由於孤兒完被逼關閉,呢對夫婦收留左修女同埋一班孤兒,呢個時候娃匠整嘅Annabelle開始對呢班孤兒行動……睇到個預告都好緊張啊!不過大家要等到8月啦!

 

 

當年小編睇《普羅米修斯》時留下好多疑問,相信有唔少朋友都會同小編一樣想法,總覺得有續集。今年小編終於等到啦!《異形:聖約》會暫定外國5月上映,一睇到個電影海報就諗起細個睇《異形》,兒時回憶返哂黎。今集會講殖民太空船「聖約號」發現未知天堂,點知事實上充滿黑暗同危險,而上集唯一生還者大衛又會再次登場。到底今次又會有咩新發現?有待8月一齊探索!

 

 

 

Stephen King嘅恐怖小說聞名天下,改編電影都唔輸蝕,就好似譽為最球最恐怖電影第一位嘅《閃靈》(The Shining),前無古人,後無來者,小編都好鍾意呢套電影。今年重新登場嘅就係《靈異魔咒》(IT),雖然90年代曾經拍過電視電影,但係電影威力夠哂強勁,令當年嘅小朋友見到小丑都怕怕,一反小丑傳統形象。現至今日,就算冇睇過呢套戲嘅朋友對小丑都猶有餘怯。不過2017年版本電影嘅資料實在太少,就連預告都仲未有,小丑造型圖片都係最近先推出。外國暫定會係今年9月上映,期待今次會有啲咩新火花!