雖然天氣涼咗唔少,但依然無阻毛毛呢個雪糕狂人嘅忠誠!愈凍食雪糕先愈過癮㗎嘛!話時話,香港嘅雪糕嚟嚟去去都係嗰幾隻味,而家興抹茶同紫薯味,就一街都係,都食到悶晒啦~

 

食雪糕嚟講,日本真係天堂嚟呀,無論你估到定估唔到嘅口味都有,好似烏冬味、豉油味、納豆味咁,係就係重口味咗啲,但勝在有得揀,咁先係老闆吖嘛!聽講早兩日,日本哈根大師又出咗新口味喇,一齊嚟睇過~

 

日本仔嘅創造力量同幻想真係會嚇你一跳呀!面層鋪滿肉碎同豆腐,仲唔係麻婆豆腐味雪糕?一凍一熱冰火交融,將雪糕嘅口感提昇到另一層次,一定會食到欲罷不能呀!

 

畀你估到就唔係食神啦傻豬,其實呢款係香蕉焦糖曲奇味雪糕,個面仲鋪咗兩款曲奇餅,係咪聽見都濕晒呢……個口。

 

有網民將堅・麻婆豆腐key咗落個雪糕度,其實好似同本身個樣都差唔多,冇乜違和感……

 

呢個Decorations系列仲有芝士紅莓曲奇味㗎,兩款都咁吸引,真係唔知點揀好呀!咦唔係喎,都冇得去日本,揀咩呀揀……