講起自助餐,大家可能會諗起豪食海鮮,瘋食和牛,點都要食夠本!不過有時候突然大魚大肉,腸胃都會頂唔住。加上成日出街食飯,多味精又油膩,對腸胃都唔好。有冇過試下素食自助餐?間中食下素食,可以清下腸胃又更健康,一齊黎睇下香港有邊3間素食自助餐啊。

 

單係聽到呢間餐廳嘅店名就知道係素食餐廳:無肉食。位於北角嘅無肉食推出午市同晚市素食自助餐,午市自助餐價錢係$58,晚市價錢係$98,仲有免費嘢飲,十分抵食。無論你想晏就定夜晚清下腸胃都得。唔好諗住素食自助餐會好寡好齋,其實素食都一樣可以好好味又多選擇。午市自助餐會有冷盤丶熱盤丶主菜同小食,而晚市就會推出更加精緻嘅款式,證明冇肉一樣可以食得精彩!想食就記住早啲排隊啦!

 

店名:無肉食

地址:北角堡壘街10至16號華曦大廈地下B鋪

營業時間:12:00 – 14:30,18:00 – 21:30

電話號碼:2528 2368

 

喺北角同鰂魚涌(上圖鰂魚涌分店)都有分店嘅甘香齋主打素菜小菜,午市會提供任點任吃餐,每日推出12款不同餸菜,任君選擇。外賣飯盒只需$39就可以任點任食,仲送埋豆漿或者湯,堂食價錢係$41,因為計埋其他開支所以價錢會較高。雖然午市嘅餸菜冇得任食,但係白飯丶紅米飯丶炒麵同炒米粉都係任食,唔怕會食唔飽。

 

店名:甘香齋

地址:北角蜆殼街6至16號保迎大廈地下D2舖

營業時間:8:00 – 15:00

電話號碼:2880 0173

 

有啲素食者選擇食素係因為唔想殺生,同樣位於北角嘅佛教慈心素食都係本著呢份心意而經營。每日推出12款不同素食餸菜,夠哂豐富。除左餸菜任食,就連炒粉麵丶湯同甜品都可以任食。而且每日推出嘅炒粉麵都唔同款,唔怕會食到悶。雖然套餐定價$46,不過可以隨客人心意畀幾多錢都可得,只希望可以滿足客人嘅營養。

 

店名:佛教慈心素食

地址:北角英皇道227-291號皇都戲院大廈地下42號舖

營業時間:11:30 – 22:00

電話號碼:6680 9391