Apple推出新產品之時,就係某啲人賣腎嘅時候。要追新款,份人工又點夠畀。諗住賣腎咩?毛毛個腎又虛又虧,都應該賣唔到幾多錢。

不過,喺無意之下,畀毛毛發現咗呢位滴蠟細路,有好路數可以買到Apple新產品。等我哋一齊偷下師啦。

 

喺澳洲墨爾本,有一個九歲細路Tadyn Flood,因為父母唔肯買AppleWatch畀佢,暗自許下承諾,要自己畀錢買到呢隻AppleWatch。

 

起初佢媽咪都以為佢講笑,點知Tadyn Flood係非常非常認真嘅!

 

Tadyn仔睇Youtube片學整香薰蠟燭,再拎啲蠟燭去假日市集賣。

由入原料、製蠟、融資,到創立自己嘅品牌,佢無問父母拎過一蚊。佢仲唔畀媽咪落場幫手,所有嘢都親力親為。

 

每次有人經過Tadyn仔檔口,同佢講:「咦你咁乖幫媽咪手嘅?」,Tadyn仔就會有啲嬲嬲豬。

因為佢先係呢間舖頭嘅老闆。

 

原來Tadyn仔嘅目標,唔係只為滿足自己追求科技產品嘅慾望。佢創業嘅最終願望,係開設一間舖頭,提供就業機會畀失業人士。

Tadyn仔證明咗苦幹先係成功之道,希望心地好好嘅Tadyn仔可以實現佢嘅夢想啦。

 

封面圖片及資料來源:news.com.au、candlebytf/Instagram